རྫ་སེར་ཤུལ་དགོན་གྱི་དགུ་གཏོར་ཆེན་མོ།

དུས་ཚོད།2018-04-11 10:16ཡོང་ཁུངས།རྩོམ་པ་པོ། སྡེ་ཐུབ་བསྟན་ཚེ་རིང་།རྩོམ་སྒྲིག་པ། GENBENJIAབཀླགས་གྲངས།846

 


སེར་ཤུལ་དགོན་པའི་དགུ་གཏོར་ཆེན་མོ་ནི་ཆབ་མདོ་བྱམས་པ་གླིང་གི་ཕྱག་ལེན་ནང་བཞིན་ལྕགས་ར་སྤྲུལ་སྐུས་བཙུགས་པ་ཞིག་ཡིན་ལ། བོད་ཟླ་བཅུ་གཉིས་པའི་ཚེས་༢༣་དང་༢༤ལ་དྲུག་ཅུའི་འགུགས་པ་ཚད་ལྡན་ཡོང་བའི་ཆེད་དུ་དྲུག་ཅུའི་རྒྱབ་གནོན་འཚོགས་ཤིང་། ཟླ་བ་དེའི་ཚེས་༢༥ཉིན་གྱི་སྔ་དྲོ་རྡོ་རྗེ་སློབ་དཔོན་དང་མཆོད་དཔོན་རྣམས་ཀྱིས་དྲུག་ཅུའི་འགུགས་པ་འཚོགས།


 


ཕྱི་དྲོར་འཇིགས་བྱེད་ཀྱི་བསྙེན་པ་ཚད་ལྡན་ཡོད་པའི་བླ་གྲྭ་རྣམས་ཀྱིས་དྲུག་ཅུ་ཆེན་མོའི་སྙན་གསན་འཚོགས་པ་ནས་ཚེས་༣༠བར་དུ་འཚོགས། ཟླ་དེའི་ཚེས་༢༧ནས་༢༩བར་དུ་བསྐང་འདོན་པས་ཆོས་སྐྱོང་ཆ་བརྒྱད་ཀྱི་ཆོ་ག་གསུངས་ནས་བསྟན་འགྲོའི་སྤྱི་རིམ་དང་ཁྱད་པར་སེར་ཤུལ་སྡེ་དགོན་གསུམ་གྱི་ལོ་གསར་པའི་ནང་གི་ཆོས་སྲིད་ལེགས་ཚོགས་ཀྱི་མཛད་བཟང་ཐམས་ཅད་ཀྱི་བར་ཆད་བཟློག་ཕྱིར་དུ་དྲུག་ཅུའི་བསྒྲལ་བ་དང་གཏོར་བརྒྱག་ཚུལ་མཐུན་ཡོང་བའི་ཐུགས་བསྐྱེད་གནད་སྨིན་གནང་། ཉིན་འདི་དག་གི་རིང་ལ་ཡང་གདུགས་དཀར་པ་འཚོགས་ནས་བསྟན་འགྲོའི་སྤྱི་རིམ་དང་ཁྱད་པར་སེར་ཤུལ་སྡེ་དགོན་གསུམ་གྱི་ལོ་གསར་པའི་ནང་གི་ཆོས་སྲིད་ལེགས་ཚོགས་ཀྱི་མཛད་བཟང་ཐམས་ཅད་ཀྱི་བར་ཆད་བཟློག་ཕྱིར་དུ་དྲུག་ཅུའི་གཏོར་བརྒྱག་ཕུན་སུམ་ཚོགས་པ་ཡོང་བའི་ཐབས་སུ་གདུགས་དཀར་མཆོག་གྲུབ་མ་གྲངས་གང་མང་གསུང་།



ཚེས་༢༨ཉིན་འཆམ་གྱི་སྔོན་འགྲོ་ལ་ཨ་ཙརྱ་གཉིས་ཀྱིས་ཐོག་མར་ས་གཟིགས། རྐང་རུས་དྲུག་གིས་ས་ཐིག་བཏབ། ཤ་བ་གཉིས་ཀྱིས་ས་འདུལ་བརྡབ། ཞྭ་ནག་སྟོབས་ཆེན་སོགས་ཞྭ་ནག་པ་དགུས་ས་བྱིན་གྱིས་རླབས།



དེ་ནས་བསྟན་འགྲོ་སྤྱི་རིམ་དྲུག་ཅུ་ཆེན་མོའི་ཟུར་རྒྱན་དུ་འབག་གི་སྟོབས་ཆེན་སོགས་ཡི་དམ་ཆོས་སྐྱོང་རྣམས་འཆམ།


 


ཚེས་༢༩ལ་དྲུག་ཅུ་པའི་གཙོས་དགོན་འདིའི་བླ་གྲྭ་ཀུན་གྱིས་ཕྱི་བསྒྲལ་གསུང་། ཞྭ་ནག་དང་འབག་རྣམས་འཆམ།



རྡོ་རྗེ་སློབ་དཔོན་གྱིས་བསྟན་པ་དང་སེམས་ཅན་ལ་གནོད་ཅིང་འཚེ་བར་བྱེད་པའི་དགྲ་བགེགས་སོགས་ཀྱིས་གནོད་པ་བཟློག་ཕྱིར་དཔལ་རྡོ་རྗེ་འཇིགས་བྱེད་དང་དམ་ཅན་ཆོས་ཀྱི་རྒྱལ་པོ་གཉིས་ཀྱི་ཆོ་ག་ལ་གཙོ་བོར་བརྟེན་ནས་དྲུག་ཅུའི་ལྕགས་མཁར་ཆེན་མོ་དང་།



དྲུག་ཅུ་ཟུར་དགུ་མ་གཉིས་རེས་མོས་ཀྱིས་མཁར་དང་ཟོར་འཕེན་པར་མཛད་ཅིང་། དེའི་སྐབས་ཚོགས་ཆེན་ཁྲི་རིན་པོ་ཆེས་ལྕགས་རིའི་ཕྱི་སོ་ནས་རིགས་ཀུན་ཁྱབ་བདག་མ་གསུངས་ཏེ་ཐུགས་སྨོན་ཡང་དག་མཛད་པ་དང་དགེ་འདུན་མང་མས་ཀྱང་གཏོར་བརྒྱག་གི་སེར་འཕྲེང་ལ་ཕེབས་ཏེ་ཐུགས་སྨོན་གཟབ་རྒྱས་གནང་དགོས་སོ།།



རྩོམ་སྒྲིག་པ།  སྐུ་འབུམ་སྐྱབས།

རྩོམ་འབྲི་བ། སྡེ་ཐུབ་བསྟན་ཚེ་རིང་།

པར་ལེན་པ།  སེར་ཤུལ་རྡོ་རྗེ།



སྒྲ་ལམ་སློབ་ཚན་ཕབ་ལེན།